Thaci: Institucionet e Kosoves te vetmet me autoritet ekzekutiv

20.08.2009
Për Kosovën vendosin institucionet e Republikës së Kosovës. Ato janë të vetmet që kanë autoritet ekzekutiv në Kosovë. Kështu është shprehur kryeministri Hashim Thaçi, të mërkurën, duke u përgjigjur interesimit të gazetarëve lidhur me pohimet për një memorandum midis EULEX-it dhe Serbisë.

Kosova është shtet i pavarur, sovran dhe demokratik, ka institucionet e saj demokratike të zgjedhur në mënyrë legale me përgjegjësi të plotë dhe vullnet të qytetarëve të Kosovës, është shprehur me këtë rast kryeministri Thaçi.

“Vendimet e institucioneve të Kosovës kanë qenë dhe do të jenë edhe sot edhe në të ardhmen autonome. Për Kosovën vendosin institucionet e Republikës së Kosovës. Ne do të respektojmë Kushtetutën, do të respektojmë institucionet e Kosovës. Ato janë të vetmet që kanë autoritet ekzekutiv në Kosovë”, ka thënë ai.

“Respektojmë edhe dokumentin Ahtisari të cilën jemi duke e implementuar. Do të vazhdojmë të ndërtojmë raporte të mira me të gjitha vendet fqinje, duke përfshirë edhe Serbinë. Këtë autoritet e kanë institucionet e Kosovës. Pra do të ndërtojmë raporte të mira me gjitha vendet e rajonit”, ka shtuar Thaçi.

Sipas kryeministrit Thaçi, “institucionet e Kosovës janë të vetmet që kanë autoritet ekzekutiv në Kosovë në raportet bilaterale”. /Telegrafi/